"ဆရာရယ်..ဖြစ်နိုင်ရင်နောက်တစ်ခါလာပြဖို့ရက်ချိန်းကိုနှစ်ပတ်လောက်နေမှခွာချိန်းပေးပါလား..
ကျွန်မခရီးစရိတ်မတတ်နိုင်လို့ပါ...."
ကြားလိုက်ရသောစကားသံကြောင့်ကျွန်မအသံလာရာသို့လှမ်းကြည့်လိုက်မိသည်.
လူပုံပိန်ပိန်ပါးပါး အ၀တ်အစားခပ်နွမ်းနွမ်း ဆံပင်များကိုတော့အပြောင်ဖီးသင်လျက်..
ရာဘာဖိနပ်နောက်ပိတ်မရှိတော့သော.. လောကဓံကြောင့်အသက်မည်မျှရှိမည်ကို
မခန့်မှန်းနိုင်သော အမျိုးသမီးတစ်ယောက်....
ထိုအမျိုးသမီးကိုကြည့်ရသည်မှာ အာဟာရပြည့်စုံဟန်မတူ...လက်များကပိန်လှီလျက်..
မျက်နှာမှာသိသာစွာချောင်ကျလျက်..လောကရဲ့အထုအထောင်းကိုဘယ်လောက်ထိခံခဲ့ရသည်မသိ..
ခြေထောက်တွေလက်တွေမှာအသားမာတွေဗရပွနဲ့...ဒါပေမဲ့သူ့မျက်လုံး..သူ့မျက်လုံးတွေကတော့
သိပ်တောက်ပလွန်းသည်...နင်လားဟဲ့လောကဓံဟု စိန်ခေါ်နေသည့် မျက်လုံးမျိုး....
ထိုအမျိုးသမီးကိုစိတ်ဝင်စားသဖြင့်ကျွန်မသူ့အနားတိုးကပ်ပြီးသွားကြည့်မိသည်.
ဘာရောဂါများဖြစ်သလဲ..ဒီနေ့တွက်သူ့ကိုဘာကုသပေးသလဲပေါ့...
ဖြစ်တဲ့ရောဂါကမေးရိုးကျိုးတာ...ကျွန်မတို့ဆီမှာမေးရိုးကျိုးလူနာတွေပေါသည်..
များသောအားဖြင့်ကတော့ဆိုင်ကယ်တိုက်မိလို့ကျိုးတာ..ရန်ဖြစ်လို့ကျိုးတာ..စသည်ဖြင့်ပေါ့..
မေးရိုးကျိုးတယ်ဆိုတာ တကယ်တော့တစ်ခြားအရိုးကျိုးသလိုပါပဲ..မတူတာတစ်ခုကတော့
တစ်ခြား လက် ခြေအရိုးကျိုးရင်ကျောက်ပတ်တီးကိုင်ရသလိုပဲ..မေးရိုးကျိုးတာကိုလည်း
(ထုံဆေး လိုအပ်ရင်မေ့ဆေးသုံးပြီး)ကျိုးလို့လွဲသွားတဲ့မေးရိုးကိုခွဲခန်းထဲမှာပြန်တည့်..
တည့်ထားတဲ့အရိုးကိုမလှုပ်အောင်အပေါ်အောက်သွားကြားထဲကနေနန်းကြိုးတွေထည့်ပြီးတုပ်ပေါ့..
.ဒီလိုကုသမှုခံနေတုန်းလူနာရှင်က အားရှိတဲ့အရည်ပဲသောက်ရတာပါ..
ဘာမှလည်းစားလို့မှမရပဲကို......တစ်လခွဲရှိရင်ဆရာဝန်ကပြန်ကြည့်..နန်းကြိုးကိုဖြုတ်သင့်ရင်ဖြုတ်..
မေးရိုးမဆက်သေးဘူးထင်ရင်လည်းဆက်ထား..ပြီးရင်တစ်ပတ်တစ်ခါ..တစ်လတစ်ခါခေါ်ကြည့်ပေါ့...
ဒီအမျိုးသမီးကအဲ့လိုမေးရိုးကျိုးလို့ပြန်ဆက်ပြီး နန်းကြိုးတွေဖြေတဲ့နေ့ပေါ့....
ဆရာကနက်ဖြန်တစ်ရက်ပြန်လာပြပြီး နောက်တစ်ပတ်ပြခိုင်းတဲ့အချိန် သူ့ဘက်ကခရီးစရိတ်မတတ်နိုင်လို့
နှစ်ပတ်ခြားမှ ပြန်လာလို့မရဘူးလား မေးနေတာပါ...
ကျွန်မသူ့အနားကိုတိုးကပ်သွားပြီး စပ်စုတတ်သူတစ်ယောက်ပီပီမေးလ်ိုက်မိတယ်..
"အမ ဘယ်ကလာတာလဲ အသက်ကရောဘယ်လောက်ရှိပြီလဲ.."
"ဆရာမရယ်..ကျွန်မက မကွေးတိုင်းဘက်ကရွာကလာတာပါ..၂၆နှစ်ရှိပါပြီ.."
၂၆ နှစ်..၂၆နှစ်ဆိုပါ့လား..ကျွန်မထက်တစ်နှစ်ပဲကြီးတာပဲ..ကြည့်စမ်း..
၂၆နှစ်ဆိုတဲ့ရုပ်က ဘာလို့များအဲ့လောက်အိုဇာရတာပါလိမ့်...
"အမ မေးရိုးကျိုးတာကဘာဖြစ်လို့လဲ..ဆိုင်ကယ်တိုက်မိလို့လား.."
"မဟုတ်ပါဘူးဆရာမရယ်..ယောက်ျားကထိုးလို့ မေးရိုးကျိုးတာပါ...
ကျွန်မမှာ သားသမီးသုံးယောက်ရှိပါတယ်..ကျွန်မကအမှိုက်ပုံတွေကနေ အမှိုက်ကောက်တာပါ..
ယောက်ျားကမြင်းလှည်းမောင်းတာ..ကလေးတွေနဲ့ကျွန်မကိုကျ ရှာမကျွေးဘဲမယားငယ်ကျယူထားတယ်..
ယူတာကယူပါစေ..ကျွန်မကပြတ်ပြီးသား..ဒီကလေးသုံးယောက်ကို သူရှာမကျွေးလဲ ကျွန်မရှာကျွေးနိုင်တယ်..
ရန်ဖြစ်ရတာက ညညမူးလာပြီဆို (ကန်တော့ပါရဲ့ဆရာမရယ်)..ကျွန်မကိုလုံချည်လာလာလှန်တယ်..
ကျွန်မကရွံလွန်းလို့ သူ့ကိုငြင်းဆန်မိရာကနေ ကျွန်မကိုဆွဲထိုးတော့တာပါပဲ ဆရာမရယ်"...
"ဖြစ်မှဖြစ်ရလေအမရယ်...နောက်တစ်ခါအဲ့ယောက်ျားလာရင်လည်းမပေါင်းနဲ့သိလားအမ..
အမကိုနှိပ်စက်ဦးမှာပဲ"..မနေနိုင်စွာ ကျွန်မ မ၀င်သင့်သောကြားတစ်ကြားသို့ဝင်လိုက်မိလေသည်...
"မပေါင်းပါဘူးဆရာမရယ်..ခုလည်းကျွန်မကဒီလိုဖြစ်တော့အကြီးနှစ်ယောက်ကိုရပ်ကွက်ကကျွေးမွေးထားပေးတာ..
အငယ်လေးကလည်းခုမှနှစ်လရှိသေးတယ်..၀မ်းလျှောလို့ဆေးရုံမှာ..ညညတွေမအိပ်ရတာကိုတော်တော်ကြာပြီ
ဆရာမရယ်"..
"ကလေးကဘာဖြစ်လို့ဆေးရုံတက်နေရတာလဲအမရဲ့"..
"ကျွန်မကအစာရေစာမပြည့်ဝတော့နို့မထွက်ဘူးလေ..ဒီတော့တစ်ရာတန်နို့်မှုန့်လေးတစ်ထုပ်ဝယ်..
ကလေးကိုအရင်တိုက်..ကျွန်မက သူကျန်တဲ့နို့လေး ဆက်သောက်ပေါ့...နို့မှုန့်မကောင်းတာတွေတိုက်မိလို့လားမသိဘူး
ကလေးက၀မ်းလျှောလိုက်တာဆရာမရယ်..ဆေးရုံရောက်လို့အသက်မှီတာကံကောင်း"...
ထိုအမျိုးသမီးစကားတွေနားထောင်ရင်း ကျွန်မ သက်ပြင်းချမိသည်..ဘ၀တွေ.ဘ၀တွေ..
ဘ၀တွေဘာလို့များဒီလောက်ခြားနားရပါလိမ့်....
"အမဒီကရှေ့လျှောက်အစာ၀၀စားနော်..သိလား...အမအသက်ရှင်နေမှအမသားသမီးလေးတွေ
အသက်ရှင်မှာ"...
ပြောမဲ့သာပြောလိုက်ရသည်..အမှိုက်ပုံနားနေသူအဖို့ အမှိုက်ကောက်ရသူအဖို့ ဘယ်မှာအစာကောင်းကောင်း
စားနိုင်မည်နည်း...
"အမခုရောလက်ထဲဘယ်လောက်ပါလာလဲ...အပြန်ခရီးစရိတ်ရော ရှိရဲ့လား"..
"လက်ထဲတော့ ခုနစ်ထောင့်ငါးရာလောက်ရှိပါသေးတယ်..ကားခက လေးထောင့်ငါးရာ..နှစ်ပတ်စာတွက်
ဆေးဝယ်ရမှာက နှစ်ထောင်လောက်ကျမယ်ဆိုတော့ လက်ထဲတစ်ထောင်တော့ကျန်ပါသေးတယ်..
နေ့လည်စာတွက်ဆန်ပြုတ်တစ်ရာတန်တစ်ပွဲဆို ကျွန်မက ၀ပါပြီ"...
ဆန်ပြုတ်တစ်ရာတန်တစ်ပွဲတဲ့..ပုံမှန်ပြောလိုက်သောစကားသံဆိုပေမဲ့နားထောင်လိုက်ရသူကျွန်မအဖို့
ရင်ဝကိုစီးကန်လိုက်သလိုပါပဲ...ကျွန်မအတွက်တစ်ထောင်ဆိုတာအသေးသုံးပေမဲ့ ထိုအမျိုးသမီးအဖို့တော့
နှစ်ရက်သုံးရက်စာ ထမင်းဖိုးပါလား...ကျွန်မခေါင်းကိုအပူတပြင်းအလုပ်ပေးမိသည်...
သူ့ကိုငါဘာကူညီရပါ့မလဲ...ကျွန်မအိတ်ထဲဒီနေ့ပိုက်ဆံသိပ်ပါမလာ..ငါးထောင်ပဲပါသည်...
ဘာများပေးရမလဲ..အိမ်မှာဆိုလျှင်တော့ကျွန်မမ၀တ်တော့သော အ၀တ်အစားဟောင်းများပေးမိမည်..
အိမ်မှာရှိသော မုန့်များပေးမိမည်..ခုတော့ဆေးရုံမှာဆိုတော့..ဒီနေ့မှပိုက်ဆံများများထည့်မလာသော
ကျွန်မကိုယ်ကျွန်မအပြစ်တင်မိသည်..အမှန်ကတော့ထည့်မလာတာမဟုတ်..လကုန်ခါနီးဆိုတော့လည်းကျွန်မလက်ထဲ
သုံးစရာပိုက်ဆံသိပ်မရှိတော့...ဒါနဲ့ခေါင်းကလည်းစဉ်းစားတွက်ချက်ရင်းလူက အိတ်တွေထည့်ထားရာ လော့ကာ နား
သွားပြီးပိုက်ဆံထုတ်မိသည်..အော်.လော့ကာထဲမှာကော်ဖီမစ်ထုတ်တွေပါလား..ဟိုနေ့ကလူနာပေးသွားတဲ့
ကော်ဖီမစ်ဆယ်ထုတ်လောက်ရှိသည်...အိပ်ချင်ရင်သောက်ရအောင်ကျွန်မလော့ကာထဲထည့်ထားခဲ့တာ..
ဒီကော်ဖီမစ်အားလုံးကိုအိတ်ကလေးနဲ့ထုပ်...ပြီးတော့လက်ထဲရှိတဲ့ငါးထောင်ထဲကနေသုံးထောင်ကိုထုတ်ပြီး
ထိုအမျိုးသမီးကိုပေးလိုက်သည်..
"အမရော့...ကျွန်မမှာလည်းဒါပဲရှိလို့...ကော်ဖီမစ်ကတစ်ခြားအိုဗာတင်းမိုင်လိုတို့လောက်တော့အားမဖြစ်ဘူးပေါ့ဗျာ..
ဒါပေမဲ့သောက်စရာမရှိတာထက်စာရင် ကော်ဖီသောက်စရာရှိတာက ပိုကောင်းလားလို့ပါ..ပြီးတော့ဒါကခရီးစရိတ်သုံးထောင်..
အမအားရှိတာဝယ်စားးးနွားနို့တွေဘာတွေဝယ်သောက်..သိလားအမ"..
ကျွန်မသူ့လက်တစ်ဖက်ကိုဆုပ်ကိုင်ရင်းပေးလိုက်တော့ ခုနကတောက်ပနေသောမျက်ဝန်းတွေ
ချက်ချင်းမျက်ရည်လည်လာသည်..သူ့ကိုကုသပေးနေသောထိုင်ခုံပေါ်ကချက်ခြင်းဆင်းထိုင်ချပြီး
ကျွန်မကိုကန်တော့သည်..မထင်မှတ်ထားသောအပြုအမူကြောင့်ကျွန်မဘာလုပ်ရမှန်းမသိ...
ပြီးမှအသက်ဝင်လာပြီးကျွန်မပါသူနဲ့တူတူထိုင်ချလျက်..
"မကန်တော့ပါနဲ့အမရယ်..ကျွန်မက အမထက်အသက်ငယ်ပါတယ်..ကျွန်မငရဲတွေကြီးကုန်ပါ့မယ်...
မလုပ်ပါနဲ"့...ပြောပြာဆိုဆိုနဲ့ကျွန်မသူ့လက်ကိုအတင်းဆွဲထူထခိုင်းလိုက်တော့..
သူ့မျက်နှာမှာမျက်ရည်တွေနဲ့ပါလား......
...............................................................................................................................
ထိုနေ့ကဆေးရုံမှအပြန်လမ်းတစ်လျှောက်လုံးကျွန်မစိတ်တွေပေါ့ပါးနေသည်...
ဘာကိုပဲမြင်လိုက်မြင်လိုက် မြင်သမျှအရာအားလုံးကလှပနေသည်....
ကျွန်မပြုလိုက်သောကုသိုလ်လေးတစ်ခု...တကယ်ပြောရလျှင်ဘာမှပြောပလောက်တာမဟုတ်သောကုသိုလ်လေးတစ်ခု..
ဒီကုသိုလ်လေးကိုပဲ တွေးရင်းတွေးရင်းကျွန်မပီတိဖြစ်မိသည်...
...........................................................................................................................
ထိုနေ့ကကျွန်မ ထမင်းစားမကောင်းပါ..
ဟင်းမကောင်း၍မဟုတ်...
ပီတိကိုစားနေသဖြင့် ဆာလောင်မှု မရှိ ခြင်းမျှသာ........
(ဟန်နာ စနိုး)
No comments:
Post a Comment